Seattle AI Week doirasida Sietlda O‘zbekiston va AQShning sun’iy intellekt sohasidagi hamkorligiga bag‘ishlangan xalqaro forum bo‘lib o‘tdi. Tadbirda texnologiya kompaniyalari, universitetlar, biznes va davlat tuzilmalarining 60 ga yaqin vakili ishtirok etdi. Qatnashchilar orasida Microsoft va Meta* mutaxassislari, Garvard va Vashington universitetlari, Shimoli-sharqiy universitet, Sietl ma’muriyati hamda AQSh SI-kompaniyalari vakillari bor edi.

AQSh va O‘zbekiston kompaniyalari o‘rtasida sheriklikni yo‘lga qo‘yish asosiy mavzulardan biriga aylandi. Ishtirokchilar raqamli texnologiyalar sohasida yosh mutaxassislarni tayyorlash, startaplarning xorijiy bozorlarga chiqishiga ko‘maklashish va sun’iy intellektni amaliy qo‘llash masalalarini muhokama qildilar. Xususan, suv resurslarini yanada oqilona boshqarish, shahar xizmatlarini takomillashtirish hamda yo‘l harakati xavfsizligini oshirish uchun SIdan foydalanish haqida so‘z bordi.

Forum yakunlariga ko‘ra, O‘zbekistonning Sietldagi Bosh konsulxonasi va Butunjahon raqamli texnologiyalar akademiyasi (WDTA) o‘zaro anglashuv bo‘yicha doiraviy memorandumni imzoladilar. Hujjat ikki mamlakat ekspertlari, universitetlari va kompaniyalari o‘rtasidagi aloqalarni rivojlantirishni nazarda tutadi. Shuningdek, tomonlar ta’lim tashabbuslari hamda O‘zbekiston ishtirokidagi pilot loyihalarni yo‘lga qo‘yish imkoniyatlarini ishlab chiqish niyatida. Ularning mazmuni va amalga oshirish muddatlari hozircha oshkor etilmagan.