"Navoiyuran" davlat korxonasi va Yaponiyaning Marubeni Corporation korporatsiyasi uran qazib olishga raqamli texnologiyalar hamda sun'iy intellektni joriy etish istiqbollarini ko'rib chiqdi. Onlayn muzokaralar 2026-yil 2-noyabr kuni bo'lib o'tdi. Ularda Marubeni'ning raqamli va texnologik yechimlarni ishlab chiqishga ixtisoslashgan bo'linmasi — Dolbix Consulting ham ishtirok etdi.

Tomonlar asosiy e'tiborni ishlab chiqarish samaradorligini oshirishga qaratdi. Xususan, ish jarayonlarini optimallashtirish, texnologik uskunalardan foydalanishni yaxshilash, quduqlarni raqamlashtirish va mahsuldor eritmalarni qayta ishlashni avtomatlashtirish masalalari muhokama qilindi. Bundan tashqari, ishtirokchilar bevosita sanoat mahsulotlarini ishlab chiqarishda zamonaviy texnologik yechimlarni qo'llash imkoniyatlarini ko'rib chiqdilar.

Uchrashuv yakunlari bo'yicha kompaniyalar hamkorlikning istiqbolli yo'nalishlarini belgilab oldi va birgalikdagi ishlarni davom ettirishga kelishib oldi. Muzokaralar "Navoiyuran" ishlab chiqarish jarayonlarini modernizatsiya qilish uchun yangi vositalarni izlashning bir qismi bo'ldi. Shu bilan birga, aniq loyihalar, ularni amalga oshirish muddatlari va ehtimoliy investitsiyalar hajmi hozircha oshkor etilmayapti.