BUTTERFLY xakerlar guruhi O‘zbekiston davlat axborot tizimlarida, jumladan, sobiq Shaxsiylashtirish agentligi infratuzilmasida jiddiy zaifliklar aniqlangani haqida xabar berdi. Avvalroq tajovuzkorlar 27 milliondan ortiq fuqaro haqidagi ma'lumotlar bazasiga kirish huquqini qo‘lga kiritgani va agar hukumat ular bilan aloqaga chiqmasa, uni darknetda sotuvga qo‘yish bilan tahdid qilgani haqida xabarlar paydo bo‘lgan edi. Biroq guruhning o‘zi bazaning haqiqiy sizib chiqishi yuz bermaganini ma'lum qildi.

O‘z imkoniyatlarini tasdiqlash uchun BUTTERFLY a'zolari Raqamli texnologiyalar vaziri Sherzod Shermatovning shaxsiy ma'lumotlarini e'lon qildi. Xakerlarning ta'kidlashicha, bu ma'lumotlar allaqachon ochiq manbalarda mavjud bo‘lgan va OSINT usullari yordamida to‘plangan. Guruh o‘zini etik xakerlar hamjamiyati deb atamoqda va uning maqsadi zarar yetkazish emas, balki raqamli infratuzilmaning himoya darajasini oshirish ekanini ta'kidlamoqda. E'lon qilingan materiallarni ular xavfsizlik muammolari haqida ogohlantirish deb ta'rifladi.

BUTTERFLY aniqlangan tahdidlar haqida muntazam ma'lumot berib borishni va o‘z jamoasiga yangi a'zolarni jalb qilishni rejalashtirmoqda, saralash shartlarini keyinroq e'lon qilishga va'da berishgan. Shu bilan birga, tizim buzilgani va aniqlangan zaifliklar haqidagi bayonotlarning mustaqil tasdig‘i hozircha yo‘q. Hodisaga daxldor bo‘lishi mumkin bo‘lgan sobiq Shaxsiylashtirish agentligi tuzilmasi 2026-yil yanvar oyida O‘zbekiston IIV tizimiga o‘tgan edi. Ehtimoliy buzilishning haqiqiy ko‘lamini vakolatli organlar aniqlashi kerak bo‘ladi.