O‘zbekiston va Ozarbayjon axborot texnologiyalari, davlat boshqaruvini raqamlashtirish va kiberxavfsizlik sohasida hamkorlikni faollashtirish niyatida. Ikki mamlakat vakillarining muzokaralari Bokuda UN Governance Innovation Summit xalqaro sammiti doirasida bo‘lib o‘tdi. O‘zbekiston delegatsiyasiga raqamli texnologiyalar vazirining birinchi o‘rinbosari Ayubxon Sultonov, Ozarbayjon delegatsiyasiga esa raqamli rivojlanish va transport vaziri o‘rinbosari Rashad Gasanov boshchilik qildi.

Hamkorlik yo‘nalishlaridan biri elektron davlat xizmatlari, raqamli infratuzilma va startap ekotizimini rivojlantirish bo‘ladi. Uchrashuv ishtirokchilari, shuningdek, IT-mahsulotlar va xizmatlar eksportini oshirish, axborot-kommunikatsiya texnologiyalari bozorini kengaytirish hamda soha mutaxassislari uchun yangi yuqori malakali ish o‘rinlarini yaratish imkoniyatlarini muhokama qildilar.

Tomonlar sun'iy intellektni qo‘llash va muhim axborot infratuzilmasini himoya qilishga alohida e'tibor qaratdilar. Idoralar vakillari kiberxavfsizlik hamda axborot tizimlarini himoya qilishning zamonaviy vositalarini joriy etish sohasida tajriba almashdilar. Muzokaralar yakunida O‘zbekiston va Ozarbayjon amaliy hamkorlikni rivojlantirish hamda raqamli sohada birgalikdagi tashabbuslarni amalga oshirish niyatini tasdiqladilar.