Oʻzbekiston iqlim rejalarini xorijiy moliyalashtirish imkoniyatiga ega aniq loyihalarga aylantirishga qaratilgan Climate Implementation Bridge (BRIDGE) xalqaro tashabbusining birinchi ishtirokchilar guruhiga qoʻshildi. Dasturning ishga tushirilishi 2026-yil 24-sentabr kuni Nyu-Yorkda Iqlim haftaligi doirasida eʼlon qilindi. Tashabbus BMT Taraqqiyot dasturi ishtirokida COP31 raisligi ostida amalga oshirilmoqda. Oʻzbekiston bilan birga Efiopiya, Fiji, Indoneziya va Pokiston ham pilot guruhga kirdi.

Dastur doirasida xalqaro ekspertlar milliy mutaxassislar bilan birgalikda Oʻzbekistonning amaldagi iqlim choralarini oʻrganadi, ustuvor yoʻnalishlarni aniqlaydi va investitsiyalarni jalb qilish imkoniyatlarini baholaydi. Ushbu ish asosida milliy maqsadlarni aniq loyihalar va xalqaro qoʻllab-quvvatlash mexanizmlari bilan birlashtiradigan yoʻl xaritasi tayyorlanishi rejalashtirilgan. BRIDGEʼda ishtirok etish mamlakatning yangilangan iqlim majburiyatlari bilan bogʻliq: milliy hissa (ONUV 3.0) uchinchi versiyasiga koʻra, 2035-yilga kelib Oʻzbekiston YaIM birligiga toʻgʻri keladigan issiqxona gazlari chiqindilarini 2010-yil darajasiga nisbatan 50% ga kamaytirish niyatida.

Ishning asosiy yoʻnalishlari orasida qayta tiklanadigan energiya, energiya samaradorligini oshirish, suvdan oqilona foydalanish, barqaror qishloq xoʻjaligi, chiqindilarni boshqarish va iqlim oʻzgarishiga moslashish belgilangan. Mamlakatning dasturda ishtirok etish boʻyicha keyingi qadamlari 8-oktabr kuni Iqlim oʻzgarishi milliy markazining Turkiya vakillari bilan onlayn uchrashuvida muhokama qilindi. Tashabbus amaliy amalga oshirish va xalqaro mablagʻlarni jalb qilishga eng tayyor loyihalarni aniqlashga yordam berishi kutilmoqda.