Oʻzbekiston kompaniyalari sunʼiy intellekt ishlab chiquuvchilariga koʻpincha chatbotlar uchun emas, balki aniq biznes muammolarini hal qilish uchun murojaat qilmoqdalar. Gap mijozlarga javob berish vaqtini qisqartirish, tarqoq maʼlumotlarni birlashtirish va hujjat aylanishini avtomatlashtirish haqida bormoqda. Bu haqda OpenAI kompaniyasining Select Partner maqomiga ega hamkori, Toshkentdagi AISolution kompaniyasi asoschisi va bosh direktori Abbos Hamidov maʼlum qildi. Uning soʻzlariga koʻra, murojaatlarni qayta ishlash va mijozlarga xizmat koʻrsatish sohasidagi loyihalar eng tez oʻzini oqlaydi. Kichik biznes uchun tayyor AI-assistent 1000 dollardan, 1S bilan integratsiyalashgan korporativ platforma esa taxminan 10–30 ming dollardan turadi.
Bunday yechimlardan eng faol foydalanadiganlar taʼlim tashkilotlari, chet elda oʻqitish agentliklari, chakana savdo tarmoqlari, distribyutorlar va baʼzi banklardir. Ishlab chiqarish, qurilish va davlat sektorida joriy etish hozircha koʻpincha pilot loyihalar yoki alohida modullar bilan cheklangan. Hamidovning taʼkidlashicha, buyurtmachilar maʼlumotlardagi nomuvofiqliklarni bartaraf etish va qoʻl mehnatini kamaytirish uchun AI ni 1S, CRM va ombor tizimlari bilan bogʻlashni tobora koʻproq xohlamoqdalar. Shu bilan birga, mahalliy bozorning oʻziga xos xususiyatlaridan biri koʻp tillilik boʻlib qolmoqda: mijozlar oʻzbek va rus tillari oʻrtasida erkin almashinadilar, ham kirill, ham lotin alifbosidan foydalanadilar, global vositalar esa buni har doim ham muvaffaqiyatli uddalay olmaydi.
AISolution rahbari soʻzlariga koʻra, mijozlarga xizmat koʻrsatishni avtomatlashtirishning dastlabki natijalari bir necha hafta ichida paydo boʻlishi mumkin. Agentliklardan birida javob berish vaqti 2–3 soatdan bir daqiqadan kamroqqa qisqardi, birinchi oyda konsultatsiyaga yozilishlar soni 40% ga oshdi. Tizim ikki hafta ichida joriy etilgan IT-maktabda konversiya olti hafta ichida 35% ga oshdi. AI bu yerda menejerlarni almashtirmaydi: u potentsial mijozning ehtiyojlari va byudjetini aniqlaydi, tasodifiy murojaatlarni saralaydi va qiziqqan xaridorlarni yozishmalar tarixi bilan birga xodimlarga uzatadi. Hamidov samaradorlikning oʻlchanadigan mezonlarini – javob berish tezligidan tortib konversiya va xatolar sonigacha – oldindan belgilashni tavsiya qiladi, chunki qayta ishlangan xabarlar sonining oʻzi biznes uchun haqiqiy foydani aks ettirmaydi.
